Festival SonRías Baixas

Boa música, gastronomía e praia. Con este cóctel infalible preséntase SonRías Baixas, festival que se desenvolve a primeira fin de semana de agosto en Bueu  –municipio da península do Morrazo–, cun variado elenco de artistas e bandas galegas, nacionais e internacionais de calidade.

O SonRías ten lugar nunha contorna paradisíaca, con impresionantes praias –algunhas a apenas cen metros do recinto e a zona de acampada–; espectaculares espazos naturais coma cabo Udra, integrado na Rede Natura 2000; e A illa de Ons, que forma parte do Parque Nacional das Illas Atlánticas, a tiro de pedra en transporte marítimo.

A particular mistura de música, praia e gastronomía nun contorno privilexiado é unha das principais marcas de identidade do SonRías Baixas, que xa é toda unha referencia do verán en Galicia e no resto do Estado.

Recinto multiusos da Estacada [Bueu] – Pontevedra. GPS: 42.324374, -8.786007

A edición de 2019

Boa música, gastronomía e praia. Esta é a infalible carta de presentación do SonRías Baixas, un festival que nos seus 17 anos de vida se ten convertido en toda unha referencia do verán en Galicia e no resto da península. A primeira fin de semana de agosto, a boa música, o audiovisual  e a mellor gastronomía galega cítanse en Bueu, no corazón das Rías Baixas.

O SonRías Baixas é “o festival dos máis festivaleiros”. A música é a súa gran protagonista e, por iso, o festival ofrece unha programación fresca e orixinal que combina artistas consagrados do panorama nacional e internacional con formacións novísimas que a organización descobre cada ano para a súa parroquia “festivaleira”. A única consigna é facer vibrar ao público con concertos potentes, divertidos, combativos…. inolvidables.

E, para quen precise descansar, o recinto do SonRías Baixas atópase no medio da vila de Bueu, o que resulta moi cómodo e accesible. A zona de acampada ten duchas e aseos, servizo de restauración e alimentos de primeira necesidade e zona de carga de teléfonos móbiles e está a un paso a pé da praia urbana da localidade.

Pon Rumbo ao SonRías Baixas. Os días 1, 2 e 3 de agosto de 2019 tes unha cita en Bueu coa mellor experiencia festivaleira do verán. As entradas xa están á venda na súa web sonriasbaixas.info un número limitado de abonos para os tres días por 31 € máis gastos, coa acampada incluída.